犯賤

唱歌的人常抱怨，記者總是問緋聞問衣著問拍拖，總不會問下一張碟的音樂路向，演唱會有些甚麼編排，最終都係家駒名言，有娛圈無樂壇。


諗番轉頭，聽你講音樂，抑係當場嘔血，抑係就如墮霧中。「我諗住下張碟會rock d，我其實好鐘意band sound，即係似bon jovi果d。」呢類就係嘔血類。「我今次會走向多電子野，再結合埋classical同埋少少space rock的味道，希望會帶俾樂迷一個好fresh好broad的空間。」嘔多兩啖血。


稍為有d sense的：「今次會俾阿邊個做producer，佢話我把聲比較柔，會嘗試做d飄d的sound，中板歌多，我的演繹亦會放棄以前較肉緊的唱腔。我地為左靈感，用左兩星期晌英國的古堡入面brain-storming，又去左好多樂隊錄過音的studio入面囉靈感，希望可以將外國的dream-pop味道結合埋廣東流行曲。」講到咁，好似好勁喎，咁不如唔駛講啦，買隻碟黎聽下咪得囉，駛鬼講咁大輪terms咩。


是否很矛盾呢？是的。音樂，用耳來聽，用心來感受，任你講到天花龍鳳，都不及親身感受來得應棍。有時分分鐘被你那篇無無謂謂的引旨，限制了聆聽時的想像空間和感受的深淺，適得其反。有些歌，瞹瞹眛眛，欲言又止，意思千萬重，餘韻無限大，歌手和聽眾就要識做，不要去做考古學家，歌手不要眉批，聽眾不要打爛沙盤，那麼一個傳奇還可以保留下去。音樂自己就是最好的答案。


當然，我說矛盾的地方，就是犯賤。那些奉送歌手逐曲評解的唱片，某某音樂人的解謎大訪問，我總是趨之若慕地去買去打爛沙盤。「原來明歌隻《春光乍泄》係佢睇完《Before Sunrise》之後作架，唔怪之得！」虛榮作崇，對人對己也一樣。