2007-06-11

盧冠廷

林子祥和杜麗莎的演唱會,最令人興奮及驚奇的環節,就是請了盧冠廷做嘉賓。其實,就算他再講十五分鐘環保概念,就算現場觀眾雅雀無聲,暗里覺得他out到唔out又或不識時務,若果能夠聽到他唱「最愛是誰」也是值得的。不過,就片段所見,很難不與林子祥合唱吧,但一合唱就只把這首歌獨有的清醒感覺一掃而空,本來是客觀反思的抽離變成失驚無神的呼天搶地。


盧冠廷生得逢時,成名於那一個還叫做百花齊放的年代。他上接顧家輝那一輩傳統流行曲製作人,下承雷仲得一輩,同期的應該有周啟生及剛起步的倫永亮。他沒有傳統的講求四正的包袱,也沒有像周啟生般玩迷幻,事實上他與倫永亮有點相像,卻比倫永亮多了幾分紮根香港的泥土味。若果說倫永亮是都市流行曲的旗手,鑽研最刁鑽的人際情感角力,盧冠廷則可算是跳出了人和人的愛恨鬥爭,於更高的層次探索靈性,人與大自然的關係。「但願人長久」不就是月滿繁星夜般聽取大自然川流不息的脈搏流動嗎?寫於六四的「漆黑將不再面對」和「世事何曾是絕對」不就是我們對命運擺弄的無奈哀鳴嗎?情歌「我未曾忘掉你」對感情的層層繾綣已經超出了普通你愛我不愛的層次,當然你也可以解讀為六四後遺,但客觀的描述始終脫不了一層對感情的反思態度。


當然最多人談論的必是「最愛是誰」,事實上這種「熟男熟女」兼夾理性與感性並存的調子在今天非常罕見,你見我點樣cut出黎做ringtone先?個人認為盧冠廷與林子祥的演繹各有千秋,林子祥時代感較重較易入口,盧冠廷則有種高人指點的禪味,當然首要條件是不要遷就請嘉賓而來個合唱。至於作給張學友的「天變地變情不變」、關淑怡的「地老天荒」,陳百強的「長伴千世紀」都是盧冠廷較大路的作品,但始終仍有他那種如同標籤式的純情天真,和成名作「天鳥」的旁若無人我自求我道的精神遙遙呼應,沒有計較自毁秒秒幾廿萬上落的情感瓜葛。


十多年前DICK LEE把盧冠廷的「天賴」和「天鳥」用TECHNO的格局連結成一首混音版,聽到我目定口呆,就是兩首歌的副歌重疊在一起原來可以這麼渾然天成,都不知是DICK LEE的慧根還是盧冠廷的才技。當然我不會忘記曾志偉「呀呀,我要品格高尚!呀呀,我要冬暖夏涼!」,不過我估十成都係林敏聰填的。我想鄭重呼籲多一次,盧冠廷唯一一次紅館個唱當年出了LD,一看難忘,我未看過有歌手在紅館,不換衫沒布景的唱足兩個半鐘,而且當年演唱會竟流露尚未成型的所謂香港精神,實在比羅大佑早兩年演唱會那種刻意為之更令人感動。希望有唱片公司可以重出DVD,點解連周影都可以有復黑版而盧冠廷則沒人問津?

15 則留言:

野孩子 說...

想不到原來還有LOWELL的歌迷。

EMI 推出的視聽精選系列《最愛》盧冠廷CD+DVD
內有盧冠廷90演唱會的十首現場演繹。

http://www.hmv.com.hk/product/canto.asp?sku=690502

PK_ 說...

盧冠廷真係有唔少佳作,民謠鄉謠底,用結他作歌,作品唔深(周啟生就踩過佢呢樣野),不過簡單直接得來動人。可能簡單,變左可塑性又高d,轉不同風格驚喜有大d。

精彩作品除左dosss兄所提及既,想加多兩隻"小丑"同"憑著愛"。"小丑"teddy玩同lowell自己玩,兩個風格都好。"憑著愛"蘇芮玩既正路版之外,小弟早幾年係北京就聽過有朋友用爵士方式演繹,一樣正,搞"諳"化運動既老牌歌手錯過左呢個選擇!

小弟自己仲好喜歡"老年時","過路人","陪著你走",同播過既"求你不要走"。

最後,講起盧冠廷就不得不提佢太太唐書琛既詞,跟住就諗起當年既小美,就覺得而家詞壇比兩位"靚仔"玩晒,認真枯燥。。。

aulina 說...

我呢兩日復黑緊蔡國權,好感動,你不提我又真是不會即時想起盧冠廷,一陣去搵下先。

Ailie 說...

老兄...「呀呀,我要品格高尚!呀呀,我要冬暖夏涼!」唔係周潤發唱咩?

不過「天鳥」同當年倫永亮「歌詞」一樣,初初出黎,聽到所有人目定口呆。要記住當年背景係傳統起承轉合四平八穩當道,呢種咁「豪放」的演繹自被歸為另類。

我中意「快樂老實人」同「泥路上」喎。

咁你(問埋PK兄喇...)又點睇...eh...勾拔勾? (一個商台一個港台既民歌友招牌。)

PK_ 說...

「歌詞」呢隻歌最搞笑係旋律先最正,歌詞就麻麻,一隻好靚既 jazz tune,唔係倫永亮既作品,曲詞由潘光沛律師包辦!

albert au? 小弟從前既偶像之一,79-82既寶麗金六碟隻隻都正,"陌上歸人","少年夢","雲外前峰","又見月明",”新曲加精選”,"搭通音樂線"。(78年隻英文碟無聽過!)之後轉投EMI再銀星,pop晒,folk味漸晒,好歌有,不過唔多(一定唔包括"再莫愚弄我")。albert 無寫歌,本地民歌都係唱 ricky 寫果d,改編民歌揀得特別好又改得好!

dosss 說...

真係估你唔到,我同ailie先剛剛講緊,唔抵得歐生以民歌王子自居。

Ailie 說...

哈,我屋企只有勾拔勾78年果隻英文...卡式帶,聽到爛晒(果陣無乜歌聽).. 但區生我真係講唔上鐘意。

另一隻經典英文碟/帶係雪碧(係,係汽水)同EMI出左隻雜錦,唱既係林子祥呀杜麗莎呀果班唱「歐西流行曲」既(唔記得有無黎愛蓮同泰迪羅賓)..

PK_ 說...

albert 只係普及舊果d民歌同搵食嗟,佢有無真係自封民歌王子都無關係,佢唔係。

Ailie 說...

PK,咁你好寫返篇喇。 :)

PK_ 說...

AC, 就地解決啦梗係。。

。。。albert 小弟都係買到EMI頭兩隻(鼓浪嶼,訴心曲)就放棄左。。。近年佢試圖將民歌推廣成生活態度+style再變成商機,已經同民歌越走越遠,係電台unplug番唱流行曲,唔係民歌,最多都只可以話佢個腔係民歌腔。佢當年"folk聲高唱"果個電台節目,就folk d。。。。其實都幾似danny summer, 搖擺教父,當年或者係,而家?!佢連推動本地band壇都無出過咩力!

。。。。。。。。

考下你!

albert 同 lowell 係EMI合唱過一隻歌叫咩呀?

dosss 說...

我想插咀:盧冠廷同李宗盛合作過一張碟,首「如風往事」都好好聽。

Ailie 說...

經Dosss提水:蚌的啟示(& 關正傑)

好似係當年公民教育主題曲...正過XX只因有你(唔係話福佳呀)喇。

aulina 說...

我想舉手講句,小妹中學時代學結他,因為albert au一場明愛show,第一次超過十二點以後返屋企,嚇到呀媽傻咗...

不過,近年唔彈好少再聽。

咦,吹得咁開心知道早少少過嚟啦!

袁智聰 說...

hi doss,

喜歡Lowell,因為一直視他(as a singer-songwriter)為港版Bob Dylan....不,是細膩版Bob Dylan才對。
我最喜愛他的專輯是「過路人」和「1989」。
他比周啟生及倫永亮早兩三年出道,嚴格來說不算同期。


大家入開西貢,不妨到他的緣色用品店拜訪他。一年多兩年前我才問過他會再寫音樂嗎?他說:「已寫不出了。」

匿名 說...

唔系啊~anita梅艳芳8788年尽显光华骚当年都出o左黑胶辣~

唔该评论下梅艳芳吧,对anita很感兴趣,不过没赶上过那个年代。