禮物

多年前我已經與同學討論在演唱會時若想要偶像對自己一見難忘的話就不要送花送剪報送大相，乾脆在握手位送榴蓮送燒鵝送生菜就睇下你班保安點反應，又無話過唔送得食物，何況都叫做可以食左佢有實用性好過送花擺兩野就謝晒，送相簿一來個經理人都會叫人剪低二來盞俾人話做功課唔見咁勤力。好多人話今時今日咁的服務態度係唔得，但大家都要學習做一個好的消費者，同埋一個有創意有主見有勇氣的歌迷樂迷，在今時今日講環保尚節儉虛浮名輕淺薄的社會風氣之下，考慮送甚麼禮物給你的偶像是一門藝術。今年容祖兒和美心就齊心合力教育公眾，面對花團綿束的粉絲只報以微笑，但當有人送上一盒包裝精美的雙黃蓮容月時，簡直是眉開眼企芳心大動，粉絲們今後在任何場合又可以多一個選擇，往後可以發展到送奇華，送聖安娜(不過成日有傳言會執笠都唔係好信得過)，一於寓宣傳香港於向偶像示好的舉動之中，至少可以帶動經濟，不要只益花商。就算阿joey驚肥黎手唔要，儲埋一百幾十盒都可以捐俾老人院兼搞場慈善騷，認真有持續發展的可能。


所以呢......你睇joey笑得幾開心！