翻唱

前輩歌手教訓後輩經常都說現在不理聲線是否好聽,總之係又唱唔係又唱,唱片係又出唔係又出。怎麼不聽見有人說,唔好係又翻唱唔係又翻唱,莫非樂壇不懂向前看了嗎?還是翻唱一直都是樂壇傳統而不想被貼上反傳統的罪名?


現在看演唱會的歌星都喜歡翻唱一兩首別人的首本名曲,以示致敬又或個人心水品味,當然不會提因為不夠歌而濫竽充數塞時間。翻唱得好當然可以錦上添花,但有時就算你唱得好,也不見得可以放在自己的履歷表上耀武揚威,你看那對「基會難得」孖兄弟唱得好又如何,未見得可以把原曲唱出另一個生命來。唱功之外,選曲也是藝術,以為選一首早被大眾公認為經典的名曲就可以提升身價則未免天真,若選一首冷門的好歌卻沒人識而備受冷落也絕對是個人承責,怎樣恰到好處真的連黃耀明也未必有示範答案。


雖然翻唱之路不好走,但可見將來都會是現世代歌手的隨身裝備,既然大家都是二打六格局,在沒有想到答案之前,就以減少錯誤為方法選歌。


Don’ts
  • 獅子山下 – 絕對是內容大於形式,感情分已蓋過藝術性,除非你出席的是國慶聚餐或長者蛇宴一類活動。


  • 夢中人/我願意 – 我知你偶像係王菲、我又知你覺得呢兩首歌都好好聽,咁你係咪就覺得唱完之後就代表你可以「撚」到首歌入面的音而踏入唱家班行列呢?你係唱得到,但唔代表你唱得出個feel,唔好以為選王菲的歌就好有taste,知唔知呀古生?


  • 明星 - 「好有星味!」「好grand!」「係佢先唱到架咋!」係囉,係張國榮葉德嫻先唱到架咋,唔係你呀小朋友!


  • 三人行 – 適當的人、適當的時間、適當的情懷、適當的閱歷才可能造就此曲的耐聽。若果是三條黃毛小子/一條黃看加兩件蛋散/兩件蛋散加一件餅女/三件餅女就不要以致敬為名獻世。


  • 情人 – 就連林憶蓮及夏韶聲都未能令人括目相看,算了吧,我懷疑Beyond自己也不敢隨便翻唱此曲。


  • 人生可有知己 – 關淑怡自己唔好再唱,阿們!


  • 約定 – 黃耀明變成陰濕版之後,你自信可以將佢變成甚麼?事實上黃耀明的版本也比不上原裝,諷刺的是王菲說不是特別喜歡這首歌。都是那一句,唱得到唔代表你係實力派。
  • 留言

    匿名說…
    現在係又致敬唔係又致敬,聽到人都厭!
    aulina說…
    還有一首:暗湧。王菲唱不好,黃耀明唱不好,彭羚也唱不好,你說為什麼?
    匿名說…
    翻唱d歌起碼都有人識, 唱得衰都會有d反應, 唱新歌就連反應都無...
    匿名說…
    canton pop 入面呢 D 致敬歌曲 , 都係最鐘意張國榮果隻碟, 突然唔記得碟名 :P
    dosss說…
    To Voxxx:

    就叫做《salute》。
    匿名說…
    同埋shirley張《X》都唔錯。

    熱門文章