2006-04-21

對話

甲:「俾我係John都一定辭職啦。一年有九個月都晌日本公幹,日本仔又鍾意同你鬥磨,朝九晚十咁做,又結左婚,夜晚返酒店喎,唔係返屋企喎。佢有咁上下學歷,做乜要咁樣做先?」
乙:「喂,做野係咁架啦,你估乜都就晒你呀。你好彩者,份工唔駛返大陸,又唔駛去第二度做野。」
甲:「咩叫做野係咁呀?若果份工要我成日出trip,我衡量過我做唔到,咁咪搵過第二份囉。係咪一定要咁逆來順受先。」
乙:「唔係好多人好似你咁好彩喎,好多人無得選擇架!」
甲:「咩叫無得選擇?我唔係將阿John同埋果d無讀書的人比較,阿John讀到碩士,份工唔好做咪走囉,我唔信佢搵唔到第二份。(心想:你唔好以為你大我幾年就好似我地呢一代人咁多埋怨又唔捱得。)」


總會有些人或同事喜歡以高人一等的心態來和你爭拗一些無聊問題,在他們心中我們永遠都是不懂事或在溫室長大的小朋友。在以上的例子中,若果甲說:「若果你係阿John,你肯唔肯咁樣做落去先?」我想乙會無言以對。當然甲沒有說出來,「我做sales一個月都可以賺到萬零蚊,咩叫做無得選擇?」一來做人不要太絕,二來覺得用這種邏輯去反駁最終得到的勝利也不是甚麼光采的感覺。下次若果遇到同樣的情況,我建議:「咁又係,你都幾有道理呀。」然後繼續食飯啦。

2 則留言:

Wense 說...

好有道理,學到野!

peter 說...

answer: speak to 'john' directly and hopefully lead to a more fruitful dialogue