無雜質的香港仔李克勤

都說李克勤是百份百無雜質的精叻香港仔典範,新大碟《演奏廳》一出又再證明我「眼光獨到」。


先不談論音樂質素。面對香港唱片市場萎縮,下載盛行,李克勤來一招「音響發燒大碟」作招徠,擺明針對音晌發燒友市場,這班人最捨得駛錢,幾千幾萬一條喇叭線科水無眨眼,區區炒價二百元的試音碟怎會放在眼內?家陣金唱片都話要下調數字,李克勤計過條數,單單包抄這班發燒友可能已夠回本,普通年青男女下載都懶得計數,還掂你們都不會付錢買碟。香港仔特點,無死錯人。


看新大碟的策略,李克勤強調要做有素質的東西,要高檔次,於是搞來現場live band實況錄音,改碟名《演奏廳》食住舊曲名「大會堂演奏廳」名正言順進駐殿堂做高檔音樂,將自己刻意抬高至藝術範疇。你記不記得李克勤同時也可以做「殘酷一叮」的主持呀?於師奶市場與所謂高檔市場隨時失分逆轉。香港仔特點,看風駛悝,又無死錯人。


不談不談還需談,音樂質素。曲詞不配,唔緊要,最緊要係同步錄音夠實況。這一邊談天長地久變愛至死,那邊談結婚等於自掘墳墓,隱約有點精神分裂,唔緊要,最緊要有四大頂級樂師照住,記住留意下二胡個擺位夠唔夠出呀。楊毅作曲的兩首「未成年同盟會」及「阿李爸爸」,一味要變化多端,旋律走勢「奇特」,好像那些音樂電影的配樂一樣追求有效果,聽完幾次都唔記得首歌係點,歌詞又係心靈雞湯式的老馮道理大雜燴,唔緊要,家陣香港駛得起錢的中產階級最受這一套,歌曲走勢高潮泆起咪好似美國果d百老匯歌劇咁囉,平時睇得書少咁聽克勤唱兩咀要保持童真及要做人正派我又覺得幾buy咁囉。香港人特點,識包裝,無死錯人。


李克勤真身示範,創意工業的精髓就是「買感覺」。

留言

說…
我覺得難受既反而係覺得鐘意李生就等於有 taste (或唔鐘意李生就等於無 taste)既聽眾,我對李生又無乜反感,因為香港係咁架嘛,佢要上位就一家要做呢d野,佢目標正確,技巧靈活啊!

至於音樂質素 ... 哈,你講唔講得出李生翻生後既歌路係咩?我就真係無足夠既表達能力講唔出勒。
匿名說…
本來以克勤把聲係有足夠實力整發燒碟
但歌曲質素低同歌詞俗,爛都今隻碟高檔不起來,
仲有.....我最唔明係點解隻碟炒得起
這邊廂HMV賣99,那邊廂連信和都炒到百四...
班人有無腦架+_+

P.S. 可否用質素而不用''素質''二字
匿名說…
鍾意你的樂評,一針見血。
dosss說…
唉,事實上,我中一二的時候也是李生的支持者,那時的他比較有味道,都仲可以叫做canton-pop,但係他在purple dream時翻唱了「月半小夜曲」開始,我就label左佢係一部發聲機器。緣份既野,無就係無架啦。
匿名說…
i am so lost here....what is wrong with 月半小夜曲 the purple dream's version? 命運符號's version 比較有味道﹖ and what do you define canto-pop as?
dosss說…
不用迷失喔...沒錯,命運符號那個版本較有味道,純粹個人意見,你儘可不同意。
Chika Kwak說…
eh, 加拿大仲播緊李生賣位元堂養陰丸個廣告。

竊以為《命運符號》係李生最似樣隻碟。(《大會堂演奏廳》已經開始有賣弄成份,但都過得去...)

熱門文章