2008-09-05

Classic Albums

國際台逢星期二晚有個classic album的節目,每集介紹一張經典唱片,9月2日晚剛好趕上第一輯,是九一年Simply Red的Stars。那時在MTV音樂台,隻stars真係日播夜播,然後就是For your babies,雖然到依家我對白人靈騷仍然木宰羊。

紀錄片必備:監製、樂隊成員、主音個人訪問,另加幾場即興表演。其實水準叫做穩穩陣陣,驚喜位都無乜,純粹滿足樂迷八掛心態。以前都講過,乜鬼眉批、乜鬼附註,對於一群死忠樂迷來說,都是唱片公司掠水的最好武器。打後會介紹U2、Nirvana、Pink Floyd等作品。

為何香港無人做?廣東歌也曾經主宰大中華流行文化,是香港人自視過低(流行曲難登大雅之堂)?還是不想動用人力物力做一些沒人看的節目(又要去加拿大搵阿顧家輝做訪問)?家駒百強哥哥阿梅都俾港台做過特輯,「經典專輯」系列實在有得諗。我懷疑都係政治取態問題:每個人心中都有一把尺,大家都係講cm就無問題,是但一個講寸就盞撩交打。你話十張經典,又有幾經典?

仙杜拉隻啼笑姻緣得唔得?叫做話第一首粵語電視主題曲。跟住許冠傑張鬼馬雙星又得唔得?夏金城地下經典又得唔得?達明石頭記得唔得?校長迷惑賣八白金得唔得?哥哥翻唱一時無兩隻salute又得唔得?學友條工人牛仔褲又得唔得?

其實真係有得做。以上所想起的,都可以有一大串故仔在背後。社會經濟民生樂壇生態次文化成長問題全部落齊。聽流行曲長大的香港仔香港女,回憶均用歌曲做註解,我想比起用穿膠花和香港精神來附會的公民教育來得貼心。

4 則留言:

gar~* 說...

無線一向少會唸新橋, 會唸新招o既既亞視手上相信無資源可以咁做, 咁就唯有留番俾港台搞~ 不過, 港台係咪都要等d歌星過o左身先做得...?

匿名 說...

次次看已故歌手特辑,港台tvb都好似没做足功课,来来去去都是那么几句几首歌,很多年份和八卦都是错的,不如采访下fans先真。

田中小百合 說...

很多東西很多人都知道了,要深入做搵D冷門唱片講又驚收視。

阿野 說...

大可做幾集,先講幾個,刺激討論。反正無線又唔係要無線一鎚定音,佢就想有咁既資格;而且「香港經典」這個題也不見得真的有一個out there的答案。

過程中甚麼是經典甚麼不是,準則是甚麼,就可以人人噴口水啦。其實誰是誰不是又唔係有咩咁大不了,如作者所講,點都好過理所當然不假思索以穿膠花當香港精神。