完美的平衡

我愈來愈發覺我們活在一個無聲的契約之中，大家都明知有點事情不妥，卻又不會宣之於口又或付諸行動，總之就心照不宣，由得事態在傳媒和互聯網的煽動之下不可收拾，又或草草了事下去。

可能大家都覺得書展有寫真賣有奶送有點傷風化，但書展仍照行書仍照買人流照樣創新高。可能大家都覺得TVB新聞事事旦旦自我審查方東昇寫稿好肉麻，但它仍然企穩收視記者做事仍然大鼻。可能大家都覺得環保好重要，但衫仍喪買BUFFET爆食車仍照飛。可能大家都覺得烈火雄心點解會去到第三集又仍然玩同一條橋仲要無演技，卻又仍然有人睇有人拍仲要搭多件黃老虎搶妻慌死你唔睇。每一日你都面對一些困境，你明知有問題，但提出來也要想到後果。可能被人話寸，扮x晒野，好清高，斯文d就話唔明你講乜，好深奧，好心d就話你諗咁多仲乜。雖然現在有人大大聲話互聯網可動員力量創造奇蹟，但tvb仍獨大，陳志雲仍風騷，周秀娜仍露暈，廣東歌仍悶鬱。再創幾多個facebook群組，最多可以霸一兩天報紙版面，要改變現實仲差成條街。

奇就奇在這裏，大家都樂於享受這種不宣之於口的墮落感覺。因為若果無呢d廢柴，又點顯得我清高？若無人俾我鬧，又點顯得我脫俗？