2012-08-03

飯袋


食飯袋其實好勁,只要把它放在手上,任何有型的裝扮會迅即跌watt至順嫂水平。我這裏指的是傳統的食飯袋,就是乜都無,較小型的所謂奶粉袋。

現在去食午飯真的比以前考究。又要銀包鎖匙紙巾職員證,女士更要化粧品。拿個手袋又好似太formal,終於讓食飯袋名正言順登場。偏偏食飯袋唔爭氣,幾年下來都是同一個樣,又或者是我們不爭氣,幾年下拿食飯袋都是拿同一個款。大家都好似覺得食飯袋都應該是這個樣的,若果拿其他款,又或會生出「不如孭番個手袋算啦」的想法,令這種食飯袋可以安穩地生存下去。而其實,就算個袋係真皮加名牌又點,放在行政lookcausal look都一樣,唔型。

你不落街食飯,但帶飯,又會催生帶飯袋,而奇異的是食飯和帶飯袋個款又相差無幾。總之,係會有人攞個小手袋,搭多個帶飯袋,而不會選擇拿一個大袋把兩者結合。一位淑女就好像拿著兩隻糭出街,總之兩樣東西要放在兩樣容器入面,好有原則。我方才發覺,原來很多人不喜歡一個大袋放晒所有嘢,而係好似同學仔咁,背包一個另必要將幾本書放晌手(偽文青呢期紅喎)

女士們不如帶手袋去食晏,省卻一身靚look被食飯袋破壞。帶飯袋可免則免了,拿個大環保袋總好看過你兩個小袋隨身。男士們?乜會拎袋咩?