吹水救市

林海峰和杜汶澤在叱吒頒獎禮上說,過去一年唱片繼續出新人繼續有,唱片市場仲有得做,但其實大家都知塊餅有幾細,如果唔係衛蘭都唔駛係咁接廣告,因為唱片無肉食,整個搵錢策略自然要上下其手,Paco深明此道,所以剎那光輝在他心中當然比永恆重要,此乃一碟新人側田能於紅館開騷之因,唱片已淪為宣傳用品或catalogue,唔理你買碟又好老翻mp3又好(係架,我覺得唱片公司真係唔係好care我地下載mp3),聽左鍾意有feel先科水聽演唱會買化妝品上電話台買冰皮月餅囉。


昨天原來有一個由香港電台「第廿八屆十大中文金曲」舉行「提升香港樂壇競爭力方案」座談會,有教授有音樂人有樂評人(但周凡夫評開古典喎)有歌手。像我這樣「沒水平」的樂迷,當然沒資格說三道四,但三姑六婆的七嘴八舌我倒也樂於奉陪。


「有教授認為許冠傑的歌至今仍耳熟能詳,惜現在這種歌便難尋了,克勤否定此說,好似自己的歌聽過兩次之後,大家已經記得,不過卡拉OK確實影響製作方案。」


李克勤當然識做,除了話自己的歌入屋率高之外,又驚人話佢d歌太唱k,所以都用卡拉ok影響製作方針來打圓場,費時個教授落唔到台,香港仔性格一再體現。許冠傑的歌易記和李克勤的歌易記是兩回事,許的歌配合當時的社會氣氛,一同成長的人自然深有共鳴。到了李克勤的時候消費者已經只顧易記而懶理歌詞,那些情情塔塔的內容也不見得無可替代,兩種所謂易記的本錢已是不同的層次。


「千嬅感到現在雙CD買單碟價,又送唇膏等附屬品,隻碟還便宜過唇膏,希望大家研究出解決方法,當然這不是一朝一夕。向來樂壇都存有競爭性,隨?經濟變差,生意難做,縮減資源是必然的事,因不景氣的環境下,慢慢演變成惡性競爭,所以各方面都有責任,歌手本身都要自我增值。」


楊千嬅基本上都係用李克勤策略,三百六十度包抄無閃失,正所謂樂壇淪陷,人人有責,解決之道當然不是一朝一夕,還望各位自行打救,阿彌陀佛。剛拿走最受歡迎女歌手,阿姐風範確不同。


「大會提供的資料顯示,香港唱片營業額由一九九五年的九億一千萬元下降至二○○○年的五億一千萬,○四年出現歌曲下載後更下跌至二億元,十年間銷量跌幅超過百分之七十。香港唱片業從業員由一九九五年的一萬二千人下降至○五的五千人。香港唱片商會主席詹峰表示,本港專售唱片的店舖由全盛期的五、六百間下降至○五年暑假的不超過一百間。香港作曲家及作詞家協會行政總裁楊子衡表示,現時該會共有會員二千七百位,活躍於創作的只有約五百位,而每年版稅收入達到五千元或以上的更是佔極少數。」


嘩,好勁喎,但係飽經經濟低迷,連年削資的香港人來說,會不會曲解為「唱片界都要瘦身啦,家陣人少左,個市都做得掂,咪就係資源增值囉!」


「作曲人雷頌德反而覺得香港人對旋律的要求比歐美聽眾更高,只是作曲人總是要迎合卡拉O K 的需要,出發點只顧?計算這首曲是否會被唱卡拉O K 的人接受,這樣做會好辛苦,令音樂人不能隨心而發地寫歌,非常悲哀,他心目中的樂壇應是百花齊放的。」


阿Mark極有悟性,當年他跟隨黃霑時經常有佳作出現,就是看通了「香港人對旋律的要求比歐美聽眾更高」,這點十分正確,因為廣東話有九個音,作曲人很難作到一首能兼顧廣東話而動聽的旋律。不過,佢咁講,我真係鄧佢慘囉,原來佢一直咁委屈,咁不如唔好做囉,離開Paco,做自己想做的音樂,咁咪令到樂壇百花齊放囉,賺少d無計架,最多來季唔好買咁多西裝囉。


「周凡夫認為,音樂應以廣大消費者為對象,不能只限於少數年輕人,每個階層的人都有聽音樂的需要。」
「陳永華認為音樂的旋律如何與語言配合相當重要,例如粵語歌曲便要有一首發揮到語言長處的音樂。他又認為流行音樂的風格全球化不是健康的發展,香港的流行音樂應發揮中國南方文化的特色,不要跟歐美潮流一模一樣,亦要反映當時社會的現狀。」



我最buy呢兩個人講的points,所以那些名曲滿天星及舊人復出也是相當健康的現象,人口老化喎,唔係個個已發展國家都得架,以李克勤的西裝理論,佢將會主攻呢個族群。


不過,水又吹完啦,咁個結論係咩呢?照我睇,班高層都係跟番年度計劃做啦,一月演唱會、二月美加巡迴、三月三個廣告、四月出精選兼做代言人……救市?哦咁出少張國語碟囉,費時俾人話dub番廣東歌咁無誠意。

留言

匿名說…
這些研討會內容在何發現?港台網站?
dosss說…
To Happy Prince,
分別在大公及文匯發現,神奇呢!
說…
更神奇是南華早報都有
匿名說…
有無睇今期壹仔訪問李進 (即前鄭秀文經理人, 前華納高層)? 同呢個座談會可謂遙遙互相呼應喎!
dosss說…
To 素顏天使:
睇左,李進講某些東西都好有道理,至少我認同佢話歌手無時間豐富自己學識。你剩係睇陳奕迅同李克勤的分別就知啦!
aulina說…
陳奕迅同李克勤的分別是:

- 一個係人爸爸,一個就快四十都唔肯結婚?
- 一個做pop就繼續pop下去,一個唔理曲詞夾唔夾都要勇闖發燒界?

同佢地唔係好熟,究竟兩者學識上有乜分別?隱約記得Eason好似係番書仔,李克勤話哂都華人中學畢業... ????
dosss說…
To aulina chan:
你講的全對,但我覺得最主要的分別是:李克勤信死一套模式,以為咁就係實力派,同埋有一群忠實樂迷會因為咁而支持佢,而佢亦講過話同陳奕迅唔同,係因為陳係自細聽外國音樂長大,單睇呢個借口而因此而劃地為牢,已經睇到有分別。
aulina說…
尋晚神推鬼撞,睇到陳奕迅響陳志雲手上接過獎(唔記得乜獎喇,因為實際上係翻煲緊國際台天使愛美麗,實在冇乜留心),原來Eason細個響英國讀書時曾經被陳志雲照顧?一日,仲俾鄰居投訴話:「唔該唔好成日練琴,而家得你一個識彈琴咩?!」。

突然想起好多好多年前,某莫文蔚訪問中提過,Karen, Eason, Mark Lui, Steven Fung一班英國友讀書時成日響房到jam歌,所以經常俾人投訴...而李克勤就讀緊中六時曾經毛遂自薦咁填?首詞俾周慧敏...睇返其實陳李都係細細個就開始同流行音樂「結緣」,仲有「創作」成份添。

但係點解而家分別咁大呢?李生d歌真係有種好??感覺,而陳奕迅就仲係好大男孩,時不時都攪下新意思,佢仲冇乜作曲填詞添!難道真的是外國的月亮較圓,the grass is always greener on the other side??
Alan Chan說…
講得好抵死!

熱門文章