2012-01-19

都唔明仲咁認真做乜

我知,是傳媒造出來的,看見報紙每天大字標題,又見像爭視帝視后般邊個有獎邊個無獎,造到個市熱烘烘。但係,你估我仲係十八廿二,廿幾年前見到校長連攞三首就捕住電視唔肯走?抑或,佢地仲覺得依家d十八廿二好好呃,一味吹話自己個頒獎禮好掂?

其實大家都知咩一回事。連歌手自己出席都無哩心機。講入屋程度,依家睇首歌紅唔紅,上youtube同facebook啦。講歌曲深度,上網上blog睇碟評啦。年尾流流,大家有個交待。電視台保證有人出年繼續出show,電台保證繼續有錢搵,歌手保證明年繼續有廣告接。晌面書見d歌手攞獎又恭喜乜恭喜物,係,有獎攞證明你有人受,但唔代表你有料到,大家一早就知,最唔明果個係個歌手自己。好似香港小姐咁,title deflation,依家攞音樂獎真係唔係咩咁巴閉,只不過將自己打咗入catalogue,睇老闆睇睇你人氣夠唔夠,係咪搵你做代言人囉。

新城一早邊緣化,一味夠獎多,算吧啦。港台叫正統,今年個場細到死,陰乾,算吧啦。叱吒自己以為領導樂壇,年年幾粒鐘,司儀口水多過茶,話有播放率做客觀標準,又咪俾晒佢眼中覺得對樂壇有「貢獻」果d。講真,佢吹咗本地原創咁耐,個scene真係死足咁耐,條數都未同佢計。無線?吓?佢有音樂咩?成個show完全無談論價值。

林峯突圍自有其群眾基礎。我問過d大學生,佢地就聽陳奕迅容祖兒大,佢地的「下一代」(補習果d)就根本只聽chok王、台星同韓星。Why so serious? 咪由佢紅囉,你唔買佢唱片唔睇佢做戲仲一樣有大把選擇,依家大家都係唔抵得佢無乜料又搵咁多錢。